Proposta debate Custodia Compartida no BNG
EXPOSICIÓN DE MOTIVOS
As rupturas da convivencia familiar creceron notablemente na última década,
sendo un dos asuntos máis delicados a resolver o da garda e custodia dos fillos e fillas
comúns.
A aplicación da lei actual supón o outorgamento da custodia individual de xeito
xeneralizado á muller. Ante os cambios sociais de equiparación de papeis ante o
coidado dos nenos e nenas outros países e comunidades adaptan as súas leis a unha
realidade cambiante atendendo tamén a dous dereitos básicos:
- Os Dereitos do Neno e da Nena polos que a Asemblea Xeral das Nacións Unidas
obriga aos estados a respectar o dereito do neno e da nena a manter relacións
persoais e contacto directo con nai e pai de xeito regular.
- O Dereito – deber dos pais de crianza e educación
Nunha sociedade en evolución e centrándonos no interese fundamental do neno
e da nena hai que garantir que pai e nai poidan seguir séndoo nun contacto continuo,
única maneira de asegurar ese coidado e educación. Hai que asegurar que pais e nais
cunha aptitude e unha vontade clara de levar a cabo o papel que lles corresponde,
poidan achegar ao seu fillo e filla uns coidados e unha educación insubstituíbles. O
excepcional ten que converterse no habitual e superar a concepción tradicional onde
se identifica o coidado das nenas e nenos coa muller.
Quedarse á marxe e aceptar como bo o existente supón darlle as costas a un
problema social que require de medidas concretas, de solucións.
Máis aló aínda, as lexislacións actuais tratan tamén de fomentar, de promover a
corresponsabilidade favorecendo a igualdade real tratando de que nun futuro non
afastado a normalización da custodia compartida sexa un feito. Así o entenden en
Catalunya, Valencia ou Aragón se atendemos á realidade máis próxima. Nós non
podemos renunciar a posuír, tamén neste tema, unha lexislación propia ao contar cun
Dereito Civil propio.
Con todo, tamén ten que haber unha serie de cautelas que garantan o ben do
menor. Considérase como fundamental contar con mecanismos útiles de resolución de
problemas nas relacións familiares: a mediación ten que ser un servizo público a
utilizar mesmo antes da propia separación como se fai xa na área de Santiago.
Publicado el
-- “Introdúcese como norma que a nulidade, o divorcio ou a separación non
alteran as responsabilidades dos proxenitores sobre os fillos. En consecuencia,
estas responsabilidades manteñen, despois da ruptura, o carácter compartido e
corresponde á autoridade xudicial determinar, se non existe acordo sobre o plan
de parentalidade ou se este non se aprobou, como deben exercerse as
responsabilidades parentais e, en particular, a garda do menor, aténdose ao
carácter conxunto destas e ao interese do menor.”
Lugo, a 29 de novembro de 2013
Asdo polos membros do grupo de traballo de custodia compartida do BNG Francisco
Torrente Hortas e Lois Manoel Toirán Vázquez.
(membros da Xunta Directiva da Asociación Galega de Pais e Nais Separados)