Proposta debate Custodia Compartida no BNG
EXPOSICIÓN DE MOTIVOS
As rupturas da convivencia familiar creceron notablemente na última década,
sendo un dos asuntos máis delicados a resolver o da garda e custodia dos fillos e fillas
comúns.
A aplicación da lei actual supón o outorgamento da custodia individual de xeito
xeneralizado á muller. Ante os cambios sociais de equiparación de papeis ante o
coidado dos nenos e nenas outros países e comunidades adaptan as súas leis a unha
realidade cambiante atendendo tamén a dous dereitos básicos:
- Os Dereitos do Neno e da Nena polos que a Asemblea Xeral das Nacións Unidas
obriga aos estados a respectar o dereito do neno e da nena a manter relacións
persoais e contacto directo con nai e pai de xeito regular.
- O Dereito – deber dos pais de crianza e educación
Nunha sociedade en evolución e centrándonos no interese fundamental do neno
e da nena hai que garantir que pai e nai poidan seguir séndoo nun contacto continuo,
única maneira de asegurar ese coidado e educación. Hai que asegurar que pais e nais
cunha aptitude e unha vontade clara de levar a cabo o papel que lles corresponde,
poidan achegar ao seu fillo e filla uns coidados e unha educación insubstituíbles. O
excepcional ten que converterse no habitual e superar a concepción tradicional onde
se identifica o coidado das nenas e nenos coa muller.
Quedarse á marxe e aceptar como bo o existente supón darlle as costas a un
problema social que require de medidas concretas, de solucións.
Máis aló aínda, as lexislacións actuais tratan tamén de fomentar, de promover a
corresponsabilidade favorecendo a igualdade real tratando de que nun futuro non
afastado a normalización da custodia compartida sexa un feito. Así o entenden en
Catalunya, Valencia ou Aragón se atendemos á realidade máis próxima. Nós non
podemos renunciar a posuír, tamén neste tema, unha lexislación propia ao contar cun
Dereito Civil propio.
Con todo, tamén ten que haber unha serie de cautelas que garantan o ben do
menor. Considérase como fundamental contar con mecanismos útiles de resolución de
problemas nas relacións familiares: a mediación ten que ser un servizo público a
utilizar mesmo antes da propia separación como se fai xa na área de Santiago.
Publicado el
PROPOSTA DE POSICIÓNS DE PARTIDA PARA O ESTUDO E DEBATE POLO
BNG DO TEMA DA CUSTODIA COMPARTIDA OU DA COPARENTALIDADE
O tema da regulación da custodia compartida está actualmente pendente de
tramitación parlamentaria no Congreso dos Deputados, existindo un dobre
pronunciamento político do BNG nesta institución, realizado primeiramente a través
da proposta de emenda de substitución do 18-06-12, pola que se propuxo instar ao
Goberno a que:
- “Presente, nun prazo de seis meses, no Congreso dos Deputados, un proxecto
de lei de modificación do artigo 92 do Código Civil, que regula as obrigacións
dos pais cos seus fillos en caso de separación e divorcio, co obxectivo de
profundar no fomento da custodia compartida dos menores, atendendo ao
interese superior dos fillos e a igualdade dos proxenitores, sobre a base do
impulso da conciliación e da corresponsabilidade parental”.
E a continuación a través do apoio á emenda transaccional coa aprobación da que
concluíu o correspondente debate, e pola que:
- “O Congreso dos Deputados insta ao Goberno a que no prazo máximo de seis
meses, e sen prexuízo das especialidades correspondentes nas Comunidades nas
que exista un Dereito Civil Foral propio, desenvolva a regulación legal que
modifique o artigo 92 do Código Civil e cantos outros preceptos foran necesarios,
para acadar a viabilidade da garda e custodia compartida nos supostos de
ruptura da unidade familiar, impulsando a conciliación e atendendo ao interese
superior do menor; debendo entenderse como un dereito do menor a relacionarse
con ambos proxenitores, así como á inversa, a obriga que teñen estes de
exercitar a corresponsabilidade parental.
En coherencia cos dous pronunciamentos precedentes, e tomando como a
referencia a normativa que pensamos que ten a priori máis posibilidades de ser
consensuada no BNG para o desenvolvemento dos mesmos, que é a regulación catalá
aprobada en xullo de 2010, a proposta e cos votos no Parlamento Catalán do tripartito
de esquerdas, proponse que se adopten neste grupo de traballo de partida as dúas
seguintes posicións básicas:
-- Nos casos de separación ou divorcio “toda proposta dos proxenitores sobre a
responsabilidade en relación cos fillos debe incorporarse ao proceso xudicial en
forma de plan de parentalidade, que é un instrumento para concretar a forma na
que ambos proxenitores pensan exercer as responsabilidades parentais, no que se
detallan os compromisos que asumen respecto á garda, ao coidado e á educación
dos fillos. Sin impoñer unha modalidade concreta de organización alenta aos
proxenitores, tanto se o proceso é de mutuo acordo como se é contencioso, a organizar por si mesmos e responsablemente o coidado dos fillos en ocasión da
ruptura”